Еден век Прилепска пиварница. Голем јубилеј  што вчера беше обележан со пригоден настан. Компаниите во Македонија што се фалат со стогодишнини се реткост, а брендовите со повеќевековно присуство на пазарот сѐ уште поисклучителни. Меѓу овие неколку се вбројува и Прилепска Пиварница, светилник на традицијата и на квалитетот во пиварската индустрија.

 – 100 години постоење на Прилепска пиварница е јубилеј кој посебно нè прави горди, затоа што сме современици и сме наследници на делото на првите основачи на компанијата, рече во своето обраќање Сашко Самарџиоски, генерален директор на Прилепска пиварница.

„Најубавото од сè е што приказната сè уште трае и некои други генерации ќе продолжат да ја раскажуваат и по нас. Возбудата е уште поголема кога денес, вака собрани, сме современици на еден настан за кој работеле и живееле толку многу генерации, а ние ја имаме честа да сме современици на овој јубилеј! Тој го искажа својот оптимизам дека успехот ќе продолжи и во наредните 100 години и дека на следниот вековен јубилеј ќе бидат сосема некои други лица, кои сега не се ни родени!“

Од основањето во 1924 година, Прилепска пиварница континуирано се развива и се приспособува за да одговори на променливите потреби на клиентите и на пазарот. За да ја одбележи оваа значајна пресвртница, Прилепска пиварница ќе биде организатор на серија настани и иницијативи во текот на годината за да ја прослави својата историја, достигнувањата и луѓето што беа дел од ова патување. 

„Стогодишниот јубилеј е потврда за истрајноста пред предизвиците на времето и општествените контексти. Доказ за работата, посветеноста и издржливоста низ променливи времиња, заработувајќи трајна лојалност од своите клиенти и индустријата. И сведоштво е на стотиците кои што со дела, знаење, одговорност и посветеност се вградија во компанијата. Тоа е нивниот залог кој што ние денеска го славиме и потстрек за нас за идни дострели“, рече Панде Самарџиоски, заменичка генерална директорка на Прилепска пиварница.

„Денес им оддаваме почит и на визионерските основачи, кои ги поставија темелите на нашата пиварница пред еден век (нивни потомци се присутни овде, во салава). Нивната непоколеблива визија и страст го обликуваа нашето патување и наследство. Тие продолжуваат да нè инспирираат додека го носиме нивното наследство напред во иднината“, изјави госпоѓата Панде Самарџиоска.

Прославата беше проследена со среќа и носталгија, затоа што со прикажувањето на краткиот документарен филм, присутните веднаш тргнаа на патување низ времето прославувајќи еден век на пресвртници, иновации и спомени. Забава во живо приредија познатите ѕвезди Калиопи и Тони Цетински, а за шегите беше задолжен Сашко Коцев со стенд-ап настап.

Прилепска Пиварница е една од најстарите пиварници на Балканот. Она што претставува заштитен знак на пиварницата е висококвалитетно пиво, почнувајќи од Златен Даб и Крали Марко, како едни од водечките домашни брендови на пиво, па сè до Tuborg и Carlsberg, Holstein, 1664 Blanc и Somersby, кои се едни од најквалитетните светски пива, а нивен дистрибутер е Прилепска Пиварница, која го произведува и култниот освежителен газиран безалкохолен пијалак Газоза. Како овластен полнител на безалкохолни пијалaци, Прилепска Пиварница ги полни пијалаците на Pepsi Cola International: Pepsi, Pepsi Lime, Pepsi Max, 7UP, Mirinda Lemon и Mirinda Orange. Увозник е на Lipton Ice Tea, како и овластен увозник за производите од познатиот бренд „Књаз Милош“ од Србија, меѓу кои: газираната вода Књаз Милош, негазираната вода Aqua Viva, енергетскиот пијалак Guarana и негазираните овошни сокови Tube, a пиварницата е и увозник на алкохолните пијалаци St. Nicolaus.

Гледајќи напред, Прилепска пиварница и понатаму останува посветена на иновациите, одржливоста и на континуираното вложување во природната средина.