Продуктивноста на нашите работници е 50 отсто од онаа на работниците во ЕУ, што значи дека на еден европски вработен потребни се двајца наши вработени. Тоа не е проблем само на работниците, туку и на компаниите, особено на малите фирми и новоформираните бизниси кои не дека не сакаат да имаат попродуктивни работни места и да бидат поуспешни, туку се соочуваат со проболеми во однос на конкуренцијата, финансирањето на своето работење, технолошкиот и техничкиот развој,..., изјави претседателката на Организацијата на работодавчи на Македонија (ОРМ), Владанка Трајкоска на националната конференција што се одржа по повод 20-годишнината на Организацијата на работодавачи на Македонија (ОРМ).
Трајковска во рамки на националната конференција насловена: „Продуктивноста и нејзините главни двигатели за економски раст и конкурентност“покрај фрапантните податоци за ниската продуктивност на трудот, односно работниците ги посочи и другите клучни наоди од истражувањето кое за потребите на ОРМ го спроведе Институтот за економски истражувања и политики „Finance Think“
-Тоа е проблем не само на работниците туку и на компаниите , особнео на малите и новоформираните кои не дека не сакаат да имаат попродуктивни работни места и поуспешни компании, туку се соочуваат со проблеми во делот ограничениот пристап до финансии, слабите институции и корупцијата. фактори кои ја нарушуваат конкуренцијата и финансирањето на нивното работење, технолошкиот и технички развој и уште многу елементи кои создаваат долгорочна непредвидливост која ги обесхрабрува инвестициите и иновациите, кои пак, заедно со добрите менаџерски практики и вештините, имаат суштинско значење за долгорочна конкурентност на домашните компании.
Истражувањето покажува загрижувачки тренд на намалување на вкупната продуктивност на македонските компании, што укажува на тоа дека фирмите во земјава стануваат сѐ помалку ефикасни во користењето на основните фактори на производство - трудот и капиталот. Дополнително, компаниите со странски сопственици имаат дури четири пати повисока продуктивност од домашните, додека извозно ориентираните компании се значително попродуктивни од оние што работат исклучиво на домашниот пазар.
„Продуктивноста е темелот на секоја успешна компанија и движечка сила за одржлив економски развој на целата земја. За да ја зголемиме, потребно е да почнеме да делуваме веднаш, преку добро обмислени и решителни реформи кои ќе ја подобрат бизнис климата, ќе значат елиминирање на системската корупција, ќе го подобрат пристапот на фирмите до финансии и ќе ги поттикнат инвестициите и иновациите во модернизација на домашната економија“, изјави претседателката на Организацијата на работодавачи на Македонија, Владанка Трајкоска.
Препораки
На конференцијата ОРМ презентираше и сет од конкретни препораки за раст на продуктивноста и деловната ефикасност, меѓу кои: обезбедување поголема финансиска поддршка за мали и нови компании преку поволни кредити, субвенции, даночни олеснувања за инвестиции во иновации и нови технологии; зајакнување на борбата против корупцијата преку зголемена транспарентност на институциите, независно и ефикасно судство; реформа на регулативата заради намалување на административниот товар и зголемување на предвидливоста на пазарните услови; ефикасна борба против нелојалната конкуренција и сивата економија преку дигитализација на услугите во јавниот сектор, засилен и координиран инспекциски надзор и ревизија на државната помош; и подобрување на инфраструктурата, особено дигиталната и енергетската, како клучен предуслов за технолошка модернизација.
Дел од сегментите од ова истражување за македонските работодавци претставуваат можност, односно насоки за помош во делот на продуктивноста на компаниите со цел да имаме поконурентни компании, посреќни работници, попродуктивни институции.
„ОРМ, како единствена репрезентативна организација на работодавачите во рамки на социјалниот дијалог со владата и синдикатите, останува посветена на тоа да биде гласот на бизнисот. Ќе продолжиме да креираме решенија во соработка со институциите, синдикатите, експертите и граѓанското општество, со цел да го поттикнеме економскиот раст, да создадеме нови перспективи за младите и да обезбедиме социјална сигурност за сите“, најави Трајкоска.
Во рамки на конференцијата се одржа и панел-дискусија на која своите размислувања, ставови и предлози за тоа како продуктивноста да стане приоритет на економските политики во државата ги изнесоа претседателот на Собранието на ОРМ Ангел Димитров, професорката на Економскиот факултет при УКИМ д-р Даниела Бојаџиева, директорот на Фондот за здравствено осигурување Сашо Клековски и директорот на Државниот завод за статистика доц. д-р Дејан Станков.
Истражувањето и националната конференција со која се одбележа 20-годишнината на Организацијата на работодавачи на Македонија беа поддржани од Меѓународната организација на трудот, преку проектот Платформа за вработување и социјални прашања – ЕСАП 3, финансиран од Европската Унија
